TANZANIA YASHIRIKI MJADALA WA KIMATAIFA KUHUSU MUS...

TANZANIA YASHIRIKI MJADALA WA KIMATAIFA KUHUSU MUSTAKABALI WA USAFIRI WA ANGA

17 Novemba, 2026
TANZANIA YASHIRIKI MJADALA WA KIMATAIFA KUHUSU MUSTAKABALI WA USAFIRI WA ANGA


Montréal, Canada, 16 Novemba 2026. Jamhuri ya Muungano wa Tanzania inashiriki Mkutano wa Saba wa Kimataifa wa Usafiri wa Anga (ATConf/7), ulioanza leo katika Makao Makuu ya Shirika la Kimataifa la Usafiri wa Anga (ICAO), Montréal, Canada.


Mkutano huo, unaoendelea hadi tarehe 20 Novemba, unawakutanisha wajumbe kutoka nchi wanachama 115, pamoja na wawakilishi wa mashirika ya kimataifa, taasisi za fedha na wadau wa sekta, kujadili sera za kiuchumi zitakazowezesha ukuaji endelevu wa usafiri wa anga.


Katika mijadala ya ufunguzi, viongozi wamesisitiza umuhimu wa kuimarisha miunganiko ya usafiri wa anga katika kukuza biashara, utalii, uwekezaji na upatikanaji wa fursa za kiuchumi. Aidha, wamehimiza nchi kuipa sekta nafasi katika sera za maendeleo na kuoanisha mipango kabambe ya usafiri wa anga na mikakati ya serikali pamoja na mipango ya uwekezaji ya wadau.


Mijadala hiyo pia imeangazia umuhimu wa kuimarisha uwezo wa sekta kuhimili misukosuko, kwa kuzingatia athari za UVIKO-19, kukabiliana na changamoto za mazingira na kuandaa wataalamu watakaokidhi mahitaji ya ukuaji wa sekta. Udhibiti wenye ufanisi, mipango iliyoratibiwa na uwekezaji endelevu vimetajwa kuwa nguzo muhimu za maendeleo hayo.


Katika mchango wake siku ya kwanza, Tanzania imeunga mkono kuimarishwa kwa majukumu ya ICAO katika kuendeleza usafiri wa anga, hususan uwezo wake wa kusaidia nchi wanachama kupitia ofisi za kikanda.


Tanzania imesisitiza kuwa programu itakayoandaliwa inapaswa kubainisha vipaumbele, majukumu ya utekelezaji, mahitaji ya rasilimali na matokeo yanayopimika. Pia, imehimiza ushiriki wa wataalamu wenye sifa kutoka nchi zinazoendelea na utoaji wa msaada unaozingatia mahitaji halisi ya kila nchi.


Mada nyingine zinazojadiliwa ni ulinzi wa watumiaji wa huduma za usafiri wa anga, tozo, ufadhili wa nishati safi na teknolojia mpya. Mkutano unatarajiwa kuhitimishwa kwa kupitishwa kwa Tamko la Mawaziri litakaloweka mwelekeo wa pamoja wa maendeleo ya sekta.


Ujumbe wa Tanzania unaongozwa na Mhe. Dkt. Khalid Salum Mohamed, Waziri wa Miundombinu na Uchukuzi wa Serikali ya Mapinduzi ya Zanzibar, akisaidiwa na Bw. Abdallah Hassan Mitawi, Naibu Katibu Mkuu wa Wizara ya Uchukuzi ya Jamhuri ya Muungano wa Tanzania, ambaye ni Mkuu Mbadala wa Ujumbe. Wajumbe wengine ni Mhe. Balozi Joseph Edward Sokoine, Balozi wa Tanzania nchini Canada; Dkt. Jabiri Kuwe Bakari, Mkurugenzi Mkuu wa Mamlaka ya Usafiri wa Anga Tanzania (TCAA); pamoja na wataalamu wengine.


Ushiriki wa Tanzania katika mkutano huu unaendana na Dira ya Taifa ya Maendeleo 2050, kwa kuimarisha mchango wa usafiri wa anga katika kujenga uchumi shindani, jumuishi na endelevu. Kuimarisha miunganiko ya anga, uwekezaji, matumizi ya teknolojia na uwezo wa wataalamu kutasaidia kukuza biashara na utalii, kupanua fursa za ajira na kuiunganisha Tanzania na masoko ya kikanda na kimataifa.

Unahitaji Msaada?